巾帼枭雄之悬崖｜程浩骏曾萌生退出念头收入低唔介意兼职送外卖

巾帼枭雄之悬崖｜程浩骏曾因睇唔到将来萌生退出念头收入低唔介意送外卖

于TVB 热播剧集《巾帼枭雄之悬崖》饰演「曹大虎」嘅程浩骏（Hellston）演出大获好评，由初出场嘅恶霸形象，到之后被宁俐（陈桢怡饰）借嚟过桥，演绎出「爱与痛的边缘」嘅挣扎，令观众对佢深感同情并封为「最惨情恶霸兵」。程浩骏于2017年加入TVB，多年来共饰演过至少30次恶人，喺拍摄《巾帼枭雄之悬崖》前更曾萌生退出娱乐圈念头。

程浩骏入行多年，多数被安排于剧集中扮演黑社会或小混混嘅角色，即使加入《开心无敌奖门人》做「奖老」，但坦言工作机会无因而大增，只係多咗好多人嗌佢「班长」。程浩骏今次凭《巾帼枭雄之悬崖》「曹大虎」获得关注，佢就表示能够被观众留意係好大嘅快乐，直言「曹大虎」算係几悲情嘅人物；又感谢《巾帼枭雄之悬崖》监製方骏钊，指对方留意到佢就算係手下甲、乙、丙好心机做，又畀佢喺《降魔的》、《爱上我的衰神》做未做过嘅角色。网民留言表示程浩骏喺《巾帼枭雄之悬崖》做得好好：「呢个曹大虎都算捱出头来啦，希望将来更多机会係电视见到佢啦」、「做得好好啊」、「大虎哥好惨啊」、「原来係奖门人个班长，唔怪得咁熟面口」等等，有网民就指睇到程浩骏个样估唔到佢係90后，惹程浩骏亲自回覆：「经历太多了。」

其实喺未拍《巾帼枭雄之悬崖》前，程浩骏处于入不敷支及迷惘期，喺睇唔到将来嘅情况下谂过离开娱乐圈，安安定定出去搵份工就算。不过，因为热爱演戏及监製一个电话，决定拍埋先走，但喺拍摄嗰个半月期间重燃团火，直言唔辛苦都辛苦咗咁多年，不如继续落去，又因「曹大虎」令佢知道自己仲有好多嘢未达到及未追求到，因此如无意外都唔会转行；亦希望工作可以更上一层楼，咩角色都唔会推。

另外，程浩骏家人体谅佢收入唔多，亦无畀太大压力佢；不过佢自己就採取积穀防饑嘅态度，炒散以外，与朋友合资开设製作公司，又推出协助老师们準备北上交流嘅网上行程，认为万一演艺事业有咩三长两短，都可以支持生计。程浩骏又唔介意边做演员边送外卖或搬屋，指自己无包袱，认为送外卖都係等人开门后递畀个客，无人认得；又直言唔係偷呃拐骗，只係努力搵钱开饭。